بقلع الضرس

بقـلــع الضــرس
من أغاني حرفوش المجذوب

وقلعك كان بقلع الضرس
ما كناش م الألم بنام
ولا نبطل صراخ بالليل
فكم نشف دماغه وقام

وياما صبرنا أه ياما
أخدنا لبوس وبرشامه
وكم قال الأطبا خلاص
علاجنا تقوم لنا قيامه

وقلع الضرس ما يكفى
فتحت الضرس كم دمل
وكم خراج بيرعاه سوس
تقلش تتار تقلش باسوس

فمطلوب ع السريع حاجتين
لمدة شهر أو شهرين
هنتمضمض بثوره الصبح
وبالليل غاز مسيل للعين

ناصر صلاح

--------------------------------------------------------------------------------


مادام اللي فوق
من أغاني حرفوش المجذوب
شعر/ ناصر صلاح

مادام اللي فوق كان حرامي وقاعد
فحتما يكون اللي تحته حرامى
وطبعا يكون اللى تحت اللى تحته
دا برضك حرامى
لكن والأكيد
بإن اللى تحت اللى تحت اللى تحته
دا أكبر حرامى
فادول القواعد
رجول الكراسى
ودول اللى لفوا البشر فى المآسى
تأبلس شويه
وعاشوا فى حماهم
وصبحوم طعامهم 00 شرابهم00 هواهم
تجنن شويه
وفازوا بعقولهم
وكم م البواقى اللى ساكت وخايف
على نعمة التوهه ياما حسدهم
وفجأه اللى ساكت بيصرخ له صرخه
تصحى اللى نايم
تشد انتباه اللى سارح و هايم
تفطر - عن الحق - كل اللى صايم
وتقلق كراسى الحراسه اللى بايشه
فتفزع تهب من الخضه هايشه
وتصدر أوامر
لكل اللى ناهب وفاجر وغادر
تغابى اللى قاعد وأطلق كلابه
فوصلت جموع الغضب عند بابه
تحدت رصاصه وكلابه وديابه
تحدت خيوله وجماله وعلاءه
تحدت جموع الفرق فى رياءه
وجه ديدبان الحدود فى رحابه
تعالت ريات الغلابه اللى ثاروا
وفتّح ببان اللومان للى جاروا
ووقعت كراسى
وطلعت كراسى
وأجمل ساعات الفرح فى المراثي
ودلوقتى وقت اللى هادى وراسى
ودلوقتى وقت الأمين واللى قاسى
على نفسه لجل يحقق لشعبه
حقوقه ومطالبه
كتير م التقدم وياخد بإيده
بعيد عن طريق اللصوص والمآسي

ومادام اللى فوق كان محب وأمين
فأهل البلد دى
بشرها وجمادها
نخيلها ونيلها
يقولوم أمين

مانشتات ثوريه

مانشتات ثوريه
من أغاني حرفوش المجذوب
للشاعر/ ناصر صلاح


1
أجمل ميادين الكون
هو ميدان التحرير
أجمل أجيال الكون
طبعا جيل التغيير
لو عشت الثورة صغير
هتعيش العمر كبير
وتواجه كل مصاعبك
ولا تسكت ع التزوير
ولا يوم هيبيعك تاجر

ولا تختل المعايير

2
إوعى 00 حاسب 00
من ثورة البركان
دا شباب بيموت علشان
الشعب يعيش فى أمان
إوعى 00 حاسب 00
تخرج م الميدان
قبل ما يجى اليوم
ونحاسب كل مدان
إوعى 00 حاسب 00
من وعد الألعبان
في الزنقة بيبقى صديق
والراحه يبان تعبان
إوعى 00 حاسب 00
تسمع أكاذيب لجبان
لو راجل قلبه شجاع
كان ينزل للميدان

3

هاتوا دم شهيد
سالي وسعيد
واتحنوا وحنوا جميع لحباب
سبحان من سبب دى الأسباب
اللـــــــــــــــــــــــــــه
الله ع الطيب
دا الجرح يطيب
والقلب الضاق
أصبح مشتاق
واسع ورحيب
واليوم الوقفه
وبكره العيد
هاتوا دم شهيد
واتحنوا وحنوا جميع لحباب




4

يا شهيد الثورة المصريه
سجل بدماك الورديه
حدوتة أحمس وبهيه
حدوتة جرجس ومحمد

وصمود الوحده الوطنيه
فلتحيا الثورة المصريه
وليحيا الجيش والحريه
وإرادة مصر الحديديه
وليسقط كل الحرميه



5

البقاء لله يا حسنى 00 البقاء لله
والدوام لله يا حسنى 00 الدوام لله

والحساب إن شاء الله
دنيا أخرى بإذن الله
البقاء لله
دعوة أم وابن شهيد
دعوة أب في – ظلم – حديد
دعوة قطر ما شافش العيد
دعوة شعب سفينه غريق
أو طيار ميت بحريق
راح وياه قناديل لطريق
البقاء لله

البقاء لله يا حسنى 00 البقاء لله
والدوام لله يا حسنى 00 الدوام لله