مـكــســوف



مفتتح
ولد الهدى
فالكائنات فرحت قوى
واستبشرت فى الأرض خير
غاب الهدى
فالكائنات حزنت قوى
مافرحش غير
إبليس وأعوانه اللئام
أصل اللجام
أصبح فى ايد نسيت تسابيح ربها
وف قلبها بركان هوى
بيزيد إذا زاد النوى
بينها وبين نور الكتاب
ولدى الهدى 00 غاب الهدى


القصيدة

مكسوف 000
مكسوف ووشى فى الأرض منك يا رسول الله
إيه راح اقول يوم هجرتك
وأنا اللى هاجر سنتك
ولا أستحق 00
انى أكون من أمتك
يارسول الله

صلى الله عليه وسلم

الإسم ناصر000
أى نعم!!
لكنى مهزوم منكسر
وف قلبى شلال من وهن
لو قلت يوم انا هانتصر
بيشدنى
ويقول لي حاسب كن حذر
مكسوف 0000
مكسوف ووشى فى الأرض منك يا رسول الله

صلى الله عليه وسلم

مخنوق أنا
مخنوق قوى
حال العباد بقى مش قوى
فوق الضعيف بيدوسوا مليون مفترى
والرحمه هربت م القلوب
ووراها فرعون المعاصي وجيش ذنوب
الرحمه طالبه المعجزه
طوق النجاه
فينك يا نوح
فين السفين
يا موسى فين بحر الإيمان وعصى اليقين
فينك يا غار سيدنا النبى
دى الرحمه طالبه المعجزه
فينك خيوط العنكبوت
فين اليمام
دا ابوجهل سالل سيفه متخفى بغمام
يدعى لدين الانهزام
يدعى لدين فيه الجسد هو الإمام
وإلهه قالوا العم سام
والسام دا سام
السام دا سام!!!!
السام دا سم بيجرى فى عروق الوطن
أكل الجميع م الشاه ولا حدش فطن
مكسوف 0000
مكسوف ووشى فى الأرض منك يا رسول الله

صلى الله عليه وسلم

مخنوق أنا
مخنوق قوى
أصبحنا إيه
أصبحنا دوره للمياه
وفك زنقه للطغاه
ويهينوا دينا نبينا
وبيطمعوا فى صمتنا 00 فى ضعفنا
ويحددوا نوع العقاب
ما احنا الجناه
واحنا اللى جبناه لنفسنا
أصبحنا حائط مبكى بس الدمع لينا
أصبحنا حيطه ومايله سدت نور عنينا
فلا عدنا شايفين الطريق
ولا عدنا حاسين بالحريق
ولا عاد لسانا بيحتمى بنور الكتاب
فهيعمل ايه
لما يحاول يشتموك حبة كلاب
غير انه يرفع دعوته
اللى فى قرارة نفسه عارف إنها مش تستجاب
فلا هو طيب مطعمه
ولا أخلص النيه
وتاب عن مأثمه
أصبحنا ايه
أبدا ما اصبحناش
أمسينا دوما والمسا طول علينا
مكسوف 0000
مكسوف ووشى فى الأرض منك يا رسول الله

صلى الله عليه وسلم

مخنوق أنا
مخنوق قوى
نفسى الدموع السجينه
ما بين حيطان المعاصى
تهرب على الخدين
تعبر جبال القسوه جوايه
وتغسلنى تطهرنى
وقلبى ينشطر نصين
ويجى م السما ملكين
وياخدوا الهم ويا الشر من قلبى
ويزرعوا بين الضلوع آيتين
نفسى أكون تابع انا لسدنا النبى
آآآآآه يا نبى
لكن إبليس اللعين
بوظ قلوب المسلمين
محتاجه تانى تنجلى
محتاجه تانى تتغسل
محتاجه تانى تتكسى بنور اليقين
مكسوف 000
مكسوف 000
مكسوف 000
مكسوف ووشى فى الأرض منك يارسول الله

صلى الله عليه وسلم



من أشعار/ ناصر صلاح

حرفوش المجذوب

حســــد

حســــــــــد
من ديوان ( حرفوشيات )
وبتبتسم !!

ما انت الهلال

وانت اللى عايش فى السما

فوق فى الأمان

واهو كل شهر بتفتكر

وتزور مقابر صحبتك م العاشقين

العطشانين للإبتسام

وبتبتسم !!

أنا باحسدك

ازاى فى وسط الضلمه دى بتبتسم

هو انت ايه قلبك حجر

وللا قلوبنا احنا البشر

ورقة شجر

كارت معايدة
من ديوان ( حرفوشيات)
من أعانى حرفوش المجذوب

أعتذر للأحباب عن هذه المعايدة الحزينة ولكنها بلا شك نتاج واقع آليم نحياه جميعا ، لقد كنا في طفولتنا نشعر بفرحة العيد ونستعد له قبل أوانه بأسابيع ، ثم في صبانا كانت الفرحة مستمرة ولكن ليست بالقدر السابق ، فلما بلغنا الهم من العمر هاجرتنا الفرحة بلا عوده ، وصرنا نحلم بها ونأملها ، ونرسمها زيفا على وجوهنا عندما نتقابل أو من أجل الصغار 00 عذرا احبتى أنى تنفست بصعوبة وبصوت عال بينكم.

ترنين 00 ترنين
ترنين 00 ترنين

- أيوه 00 ألوووووه

*أستاذ ناصر 000

- أهلا يا احمد
عامل إيه

*أشكر ربى
قلت انا أسبق
نفسى أعيد مره عليك


- بتقول عيد ؟!
عيد إيه يا احمد!!
دى الذكرى السنويه بتاعته
بس احنا 00
تسرقنا السكينه يا صاحبى
زى الأب اللى ابنه يموت وما صدقش
يجى فى ذكرى ميلاده يجيب
شمع وتورته
وبيتوهم انه معاه
لا ويكتر من هداياه
يدعى اصحابه وكل احبابه
طبعا منعا للإحراج
ومشاركة فى الإحساس المتغيرش
غصبا عنهم لازم يجوا

*حيلك حاسب
إيه يا أستاذنا
مالك يأس

- اسمع يا احمد
ادبح يا ابنى ووزع لحمه
واقرا الفاتحه
واطلب للأعياد الرحمه
اطلب للأعياد الرحمه

شــــــــــوق


يارب0000
يارب مشتاق لك
يارب0000
يارب تشتاق لي
تبعت ملك م السما
للحج ينده لى
مشتاق ازور النبي
لوماشى على رجلى
دفتر ذنوبي اتملا
والحج يمحيه لى
يارب مشتاق لك
يارب تشتاق لى


ناصر صلاح

يا هل ترى؟؟

يا هل ترى؟؟

في الذكرى الثامنة

مهداه إلى شهداء قطار الصعيد المحترق

الثلاثاء 7 من ذى الحجة 1422--- 20/2/2002



مفتتح



من فوق قضيب الشوق

قطر الوصال بيمر

طعم اللقا كان حلو

مين اللي خلاه مر





القصيدة



تووووووت 000 تووووت 000 تووووت

إزعق يا قطر الموت

يا هل ترى ؟!

كان النفير دا عويل

كان الحديد 00 حاسس بإنه قتيل

رغم البشر جواه 00 وفرح العيد

والكل كان مشتاق لحضن بعيد

يا هل ترى؟؟

يا هل ترى كان القضاء ويا القدر

وللا جبان كالعاده قام بينا وغدر

وللا جهنم خدها شوقها للبشر

فكان الوعيد

من نصيب قطر الصعيد





يا هل ترى ؟؟ يا هل ترى ؟؟

القلب داب م الهلهله

والدمع فاض م الولوله

واللى سمع

غير اللى كان فيها ورأى

لو كان لحق بس ورأى



لو كان طبيب المشرحه

يفتح قلوب المفحمه

كان التقى 000

إن القلوب متحروقه

من بدرى قبل المحرقه



النار ما حرقتش البدن

طول عمره بين جمر المحن 00عمره ما أن

والعضم من صبره انطحن

النار دى ولعت فى الهموم

تحت الهدوم

النار دى جرفت بسمه خضره منوره

رغم الغيوم

البسمه دى كات خيط رفيع

آخر خيوط الروح وكات

فيها العروق متلضمه

أما الخيوط الباقيه كات مستسلمه



يا هل ترى؟

شيل الوزير

شيل الغفير

راح يكشف الأسرار ويردم ألف بير

السر إيه

قولوا عليه

البحث جارى

ياما جارى البحث فيه



يا هل ترى

أيه آخرة الموضوع خازوق

لما تقولولنا السر فى الصندوق

إوعوا تقولولنا السر فى الصندوق



مختتم



من فوق قضيب الشوق

قطر الوصال بيدوس

طعم اللقا كان حلم

من حوله لكابوس







ناصر صلاح

مــــقــارنــة
من اغانى حرفوش المجذوب
سواد الصبح أطول من سواد الليل وأ خطر
سواد الليل بيخلص ويَّا ضي الفجر الأخضر
سواد الصبح ويَّا الليل بيكتر
سواد الليل دا راحه..
وبصراحه..
ممكن يكون إلهام لشاعر
والمشاعر فيه مباحه
سواد الصبح هم كبير وضيق
وأكبر مساحة في عمرنا..
للهم دايمًا مستباحه
سواد الليل بيستسلم لصوت الفجر
بيتوضَّى بأمل بكرة
وبيصلي مع المظاليم..
صلاة العدل والقدرة
وبيغني مع العشَّاق..
مع المشتاق
غناوي الحب والذكرى
سواد الصبح سوط جلاد
وسيف سياف
ورغم الظلم والجبروت
يعيش عمره ذليل خواف
ولو يسقينا كاس مره
بنشرب من سموم غدره
جميع لصناف
يعذبنا... يموِّتنا
ويستعمر قلوب غيرنا
يسوّد صبحهم عنَّا
وييجي في الزمن غادي
شاعر تاني
شاعر عادي
بيتوجع كما وجعي
يقول قولي
ويصرخ صرختي ينادي:
سواد الصبح أطول من سواد الليل واخطر
سواد الليل بيخلص ويَّا ضي الفجر الاخضر
سواد الصبح ويَّا الليل بيكتر

شعر/ ناصر صلاح

طابور الموت

طابور الموت

طابور الموت
ما فيش زحمه عليه ولا ضرب
دى ناس ع الوقفه مغصوبه

قليل فرحان ومتجهز لساعة الكرب
خفيف لحمال
وعاش صافى وكان بيعف

قليل حزنان
على كتافه جبال م الذنب
بيتهرب ويتدارى
ونفسه يكون في أخر الصف
ويدى القلب أخر فرصه فى المشوار
يعود للدرب

كتير واقفين كما طوبه
لحد ما تيجى معتوبه
فا دول عاشوا ما بين الناس كما الأموات
وبكره يعيشوا بعد الموت عذاب وآهات
ومفتاح الضلال يصبح على دماغهم 000
قفال من نار
وسلسلة الندم تتلف فى رقابهم 00
سموم ومرار
وعينهم اللى ما دمعت
لمشهد طفل متقطع
وكان الهلف منيهم 000
أمام الشاشه بيقزقز فى سيرة الخلق يتمطع
عينيهم دى هتبكى الدم مرعوبه
دا كانوا فى نهار الزيف
نخيل كداب
ونهر الكبر يرويهم
فيطرح فرقه ما بينهم وبين الناس
يخليهم كما الأعداء
ويجمع كل أفعالهم 00 تحالفهم مع الوسواس
هايبقوم تحت فى جهنم
وكل اللى عليه داسوا
هايصبح فوق بيتنعم

&*&*&*&*&

طابور الموت
واقف بنظام
لا فى بطاقه ولا جوازات
ولا تأشيره أو وسطات
ولا تميز مابين فقرا ووسط وذوات
ولا فى كبير ولا صغير
ولا فى طويل ولا قصير
ومهما الدنيا تتخصخص
هيفضل عام
ويتفرق على الواقفين
مع شمس الصباح وجبات
طبق كوابيس
رغيف أوهام
وشوب آمال
وكوكتيل من فرح ودموع
إزازة ميه م الأحلام
وناس زادها كتيييييييير فتموت
تسيب الباقي للورثه
وناس تحتاج كتييييييير م الزاد
وناس محتاجه للفرصه
فى طابور الموت
وناس يكفيها لو قرصه
ف طابور الموت


حرفوش المجذوب